वीरगञ्ज,१६जेठ । बारा प्रहरी ठूलो परिमाणमा नक्कली नेपाली रुपैयाँ बरामद गरेको छ । जिल्ला प्रहरी कार्यालयको विशेष टोलीले नक्कली नेपाली रुपैयाँसहित एक भारतीयसहित ४ जनालाई पक्राउ गरेको हो ।
प्रहरीले १३ लाख १६ हजार नेपाली नक्कली नोटसहित ४ जनालाई पक्राउ गरेको बारा प्रहरी प्रवक्ता दधिराम न्यौपानेले जनाए । उनका अनुसार विशेष सूचनाको आधारमा जिल्लाको सिम्रौनगढ नगरपालिकाको वडा नम्बर ९ मा गरी छापामारीबाट बरामद भएको हो ।
प्रहरीले नेपाली नक्कली नोटसहित बारा कोल्हवी नगरपालिका ६ का राजन चौधरी र आकाश चौधरी तथा रौतहट राजपुर नगरपालिका १ निवासी मोहन कुमार साहलाई पक्राउ गरेको हो । पक्राउ परेका तीनै जना नेपालीहरुको साथबाट प्रहरीले ७ लाख ७ हजार नक्कली नेपाली रुपैयाँ बरामद गरेको प्रहरी प्रवक्ता न्यौपाने बताउँछन् ।
यसैगरी प्रहरीले साइकलमा नेपाली नक्कली नोट लिएर आउँदै गरेका भारत विहार मोतिहारी थाना कबैया पञ्चायतका महम्मद आलमलाई पक्राउ गरेको हो । उनको साथबाट ६ लाख ९ हजार नक्कली नोट बरामद भएको बारा प्रहरीले जनाएको छ । पक्राउ परेकाहरुको साथबाट प्रहरीले २ वटा मोटरसाइकल र एउटा साइकलसमेत बरामद गरेको बताएको छ ।
प्रहरीले उनीहरुको साथबाट ना ३४ प ३५१२ र बीआर ६ ए डब्लु, २७५८ नम्बरको मोटरसाइकल बरामद गरेको हो । पक्राउ परेकाहरुलाई जिल्ला प्रहरीको कार्यालयको हिरासतमा राखेर थप अनुसन्धान प्रक्रिया अगाडि बढाइएको प्रहरी भनाइ छ ।
सशक्तिकरणका लागि अनुसन्धान, चेतना र संचार नेपाल (रेस–नेपाल) एक अविछिन्न , गैर राजनीतिक उद्देश्य लिएर स्थापित दिगो विकासमा समर्पित स्वशासित गैर सरकारी संस्था हो । रेस–नेपाल २०६१ सालमा जिल्ला प्रशासन कार्यालय पर्सामा दर्ता भएको हो । सामुदायिक रेडियो नारायणी एफएम १०३.८ मेगाहर्जले २०६३ कार्तिक ४ गते आफ्नो परिक्षण प्रशारण शुरु गर्यो।
